Á degi íslenskrar tungu voru veitt íslenskuverðlaun menntaráðs Reykjavíkur. Verðlaunin voru veitt í þriðja sinn og er markmið þeirra að auka áhuga grunnskólanema á íslenskri tungu og hvetja þau til framfara í tjáningu og töluðu og rituðu máli. Verndari verðlaunanna er frú Vigdís Finnbogadóttir, fyrrverandi forseti Íslands. Í ár var einn nemandi úr Álftamýrarskóla í hópi verðlaunahafa, Soffía Sif Baldursdóttir í 6/7 AB. Ástæða fyrir tilnefningunni er að Soffía Sif hefur mjög ríka tilfinningu fyrir íslensku og hefur mjög góð tök bæði á töluðu og rituðu máli. Hún les mikið og hefur óvenjulega mikinn orðaforða og talar litríkara mál en gerist og gengur meðal jafnaldranna. Soffía Sif dvaldi mikið hjá ömmu sinni í uppvextinum og þar var mikið lesið og spjallað og telur hún að ást ömmunnar á tungumálinu hafi haft áhrif á hana. Soffía er þegar farin að semja ljóð og sögur.